26 de decembro de 2024.- Un total de corenta nenos e nenas, de entre 5 e 16 anos, tomaron parte na quinta edición do Pequetrail de Lousame, disputado na tarde do pasado sábado. As baixas temperaturas non minguaron a participación nunha edición que se converte na segunda máis concorrida da curta historia desta proba, só superada polos 57 participantes do ano 2022.
O Pequetrail desenvolveuse na contorna do polideportivo municipal Pilar Barreiro Senra sobre unhas distancias e cun percorrido adaptado ás idades dos nenos e nenas participantes. Os primeiros en saír foron os máis pequenos, os Sub-8 que percorreron algo máis de 500 metros, algúns deles acompañados polos seus pais ou nais. Despois saíron os sub-10, en cuxa saída houbo moitas bromas sobre as identificación das cores que delimitaban o circuíto debido a que o ano pasado unha parella se despistou e, no cano de facer os 1.000 metros que lles tocaban, remataron correndo máis de 3 quilómetros. Desta vez non houbo confusión e chegaron á meta cos seus compañeiros.
Finalmente, tocoulles a quenda aos cadetes e xuvenís, que percorreron uns 7 km. Aínda que ningunha das probas era competitiva e todos os participantes recibiron a mesma medalla de agasallo, a rapidez coa que a parella de xuvenís realizou a proba fixo que dende a organización os convidaran a participar de forma gratuíta no trail curto deste domingo, previa consulta cos seus adestradores. Unha proba que pecha hoxe inscricións e que supera xa os 400 inscritos.
Entrega de medallas
A concelleira de Deportes, Mariel Agrafojo, e a concelleira de Cultura, Silvia Agrafojo, foron as encargadas de entregarlles as medallas a todos os participantes, así como unhas lambonadas e un pequeno avituallamento con auga e froita para repoñer forzas. A proba foi organizada polo Concello de Lousame e contou coa colaboración de GADIS, a rede de Voluntariado lousamiá, o Club de Atletismo Lousame, a Cruz Vermella de Noia e Protección Civil de Lousame.
