Segundo os datos de Servizos Sociais, 157 persoas maiores viven soas no municipio, polo que agora buscan persoas voluntarias para esta iniciativa
Lousame, 15 de marzo de 2021.- Un total de 157 persoas maiores viven soas no concello de Lousame, segundo os datos recollidos dende o departamento de Servizos Sociais durante o último exercicio. Ante esta cifra, o Executivo local pon en marcha un novo programa de acompañamento para axudar a estas persoas no seu día a día. Os departamentos de Servizos Sociais e de Voluntariado coordinarán esta iniciativa, que consiste en programar unha visita semanal dunha hora de duración dunha persoa voluntaria ao domicilio da persoa maior. O obxectivo é que, co paso do tempo, se estableza un vínculo de confianza entre ambas persoas e sobre todo evitar situacións de illamento social. Durante ese período de tempo, a persoa voluntaria, que previamente recibirá indicacións por parte dun técnico de Voluntariado, deberá facilitar e potenciar a autoestima, mostrar empatía e dar ferramentas e recursos para paliar a soidade.
Na actualidade, búscanse persoas voluntarias que dispoñan dunha hora libre á semana para exercer este voluntariado, para o que non é necesario dispoñer de vehículo. Todas as persoas interesadas en participar no programa de acompañamento pode inscribirse a través do departamento de Servizos Sociais, no número de teléfono 981 820 494.
En caso de que as restricións pola situación sanitaria non permitan asistir aos domicilios, o servizo prestarase a través do teléfono, de xeito que se faga un seguimento das persoas maiores que viven soas.
Durante os meses do confinamento ao longo de 2020, o departamento de Servizos Sociais puxo en marcha esta iniciativa na que se acudiu ao fogar de 10 persoas maiores e se fixo seguimento telefónico doutras 150. A experiencia foi moi positiva, posto que implica dotar dunha rede de apoio a estas persoas que, en moitas ocasións, teñen dificultades para a interacción coa sociedade.
Este programa está financiado pola consellería de Política Social da Xunta de Galicia.
